Opið bréf til Gylfa Magnússonar, viðskiptaráðherra

Hæstvirtur viðskiptaráðherra,

Gylfi Magnússon.

Þú lést hafa eftir þér í blöðum nýlega, að það sem vantaði væru traustir lántakendur. Ég vil leyfa mér að mótmæla þessari mjög svo vanhugsuðu ályktun hjá þér.

Samkvæmt minni bók þá er það sem helst vantar hér á landi, sæmilega hæfir ráðamenn. Einhverjir sem þora að taka á þeim bráða vanda sem steðjar að. Vanda sem hefur steðjað að allt frá því við upphaf árs 2008.

Vanda sem fengið hefur að skjóta rótum í innviðum þjóðarinnar án þess að nokkuð hafi enn verið gert sem teljandi gagn er að.

Vissulega hafa borist pólitískar yfirlýsingar. Fyrirsagnir í blöðum um að heimilum og skuldurum verði bjargað.

Skjaldborgir og velferðabrýr hafa verið teiknaðar.

Og enn bíðum við innan um hrunrústir framtíðardrauma okkar.

Boðaðar aðgerðir ríkisstjórnarinnar vekja enga von í okkar brjóstum um að hér verði gripið til raunhæfra aðgerða sem einhverju skila.

Þvert á móti sýnist okkur sem hugmyndaauðgi ráðamanna sé endanlega þrotinn. Aðgerðakvíðinn hefur yfirtekið skynsemina og kjarkurinn hljópst á brott með trúverðugleikanum.

Nú er svo komið að ekki verður lengur við það stætt að bíða. Við þurfum að bregðast við og þess vegna blásum við, lánþegar Frjálsa fjárfestingabankans, til sóknar gegn óréttmætu, ólöglegu og spilltu sérhagsmunakerfi.

Við stöndum upp, viðurkennum styrk okkar og gerum okkur að sama skapi grein fyrir vanmætti ykkar.

Við krefjumst lausna.

Slitastjórn Frjálsa fjárfestingabankans er vanhæf til að sjá um hagsmuni bankans og þar með örlög okkar, lánþeganna, þar sem þeir hinir sömu sitja jafnframt í slitastjórn SPRON. Hér er um greinilegan og allt að því hættulegan hagsmunaárekstur að ræða sem aðeins mun leiða til óviðunandi niðurstöðu fyrir alla hagsmunaaðila.

Við krefjumst því að fá aðkomu að samningum við kröfuhafa Frjálsa fjárfestingabankans, í þeim tilgangi að semja beint við þá um leiðréttingu skulda sem við stöndum frammi fyrir að borga.

Lánasafn það sem bankinn á er í raun aðeins að verðmæti núvirtra framtíðarafborgana lánþegana og um leið og lánasafn fer í vanskil, þá lækkar verðið og verði vanskil viðvarandi, þá telst lánasafnið nánast ónýtt á alþjóðlegum fjármálamarkaði þar sem núvirt greiðsluflæði er hríðfallandi stærð.

Við höfum því afl til samninga sem hvorki þú, í krafti ráðherraembættis, né bankinn, í krafti hagsmunaárekstra, hafa yfir að ráða.

Við lýsum okkur tilbúin til aðgerða verði ekki við okkur rætt, kröfum okkar mætt og ranglátum innheimtuaðgerðum hætt.

Aðgerðir felast í greiðslufalli, enda ljóst að greiðsluvilji hins skynsama þegns er á þrotum.

Ef þú, hæstvirtur viðskiptaráðherra, ert þeirrar skoðunar að hér þurfi að grípa til lausna, þá mælumst við til að þú setjist niður með okkur og vinnir þig í átt að þeirri lausn.

Í samstarfi við fólkið í landinu, okkur, lánþegana.

Þjóðina.

Með vinsemd og virðingu,

Guðmundur Andri Skúlason

Ásakór 12 – IS-203 Kópavogur

615 1522 – 445 2580

[e-mail]

http://gandri.wordpress.com

Óraunsæi að hundsa verkfall

Athugasemdir

[Sigurður Hrellir, 18.9.2009 kl. 00:22]

Þú stóðst þig vel á þessum fundi Gandri.

[Kristján Loftur Bjarnason (IP-tala skráð) 18.9.2009 kl. 00:40]

Skuldinn er upp greidd við eigum inni helling hjá ríkistjórn fyrri tíða. þá nefni ég kvótakerfið. Þingmenn fyrri tíða og ráðamenn sem störfuðu í ýmsum stjórnum ríkisins úthlutuðu sér og sínum kvóta á silfurfati, svo það voru þeir sem spilltu þessu og héldu spillinguna uppi. Kvótakerfið er hreint mannréttindabrot þetta með að hafa kvótakerfið, skapa menn peninga en það eru í raun peninga þeirra á milli sem deildu á milli sín kvóta. ÍSLENDINGAR eiga allt inni hjá ykkur þið verðið að fella niður skuldir allra ef þið ætlið að lifa af. Ég er þeirrar skoðunar að ákveðnir ráðamenn fyrri tíðar sitji en í stjórn eða hafi menn sér við hliðar sem standi í ákveðnum stöðum bæði í stjórnum í höfuðborg íslands og annar staðar á landinu og í ýmsum ráðuneytum út erlendis þá á ég við sjálfstæðis og framsóknar menn og frjálslinda og samfylkinguna en ég get samt ekki dæmt vinstri græna, og borgaraheifinguna fyrir þetta.

[Halldór Sigurðsson, 18.9.2009 kl. 18:10]

Sæll ,en er þetta myndband hér eigi af yður að tala við Viðskiptaráðherra í gær?

http://www.youtube.com/watch?v=ZScKdAgybY8&feature=player_embedded

[Jóna Kolbrún Garðarsdóttir, 23.9.2009 kl. 01:11]

ÉG sá myndbandið þar sem þú talaðir við Gylfa, frábært hjá þér. 

[Kristín (IP-tala skráð) 23.9.2009 kl. 20:33]

Ég er sammála öllu því sem Guðmundur Andri , skrifar og sagði í sjónvarpi í kvöld 23.09.09 .

Stöndum saman !

Við höfum ekkert að gera með ráðherra sem langaði bara í stól og eftirmæli , jafnvel mynd af sér . Mér finnst Gylfi hafa brugðist einsog Ragna Árnadóttir .

VANHÆFT FÓLK .

[Jón Magnús, 24.9.2009 kl. 09:47]

Ég fór niður í Frjálsa í gær til að athuga hvaða möguleikar væru í stöðunni eftir að lánið mitt affrystist í október og einn valmöguleikinn sem stúlkan gaf mér upp væri að ég gæti hugsanlega keypt skuldina mína af bankanum en það væri ekki búið að útfæra það.  Þetta fannst mér svolítið sérstakt og kannski merki um það að þeir séu eitthvað að hugsa um þetta, þetta er nú brilljant lausn fyrir bæði kröfuhafa og okkur sem skulda þarna :)